Meghalaya a·doko 2018 bilsionin koila (coal) badingani gimin sorkari GST gong krore 13.87-ko man·aha aro niam gri koila bikotenggipa sak 14 mine owner-rangko rim·aha ine Chief Minister Conrad K Sangma parakataha.
Meghalaya Legislative Assembly-o opposition dolni sing·anina aganchakengon, Chief Minister Conrad Sangma indine talate on·aha je, 2018 bilsini April 1 tarikoni 2024 bilsini December 31 tarikona kingking, a·doko koila salruraanichi sorkari ia GST tangkarangko man·na amaha.
Ia GST tangkarangko man·ani bidingo talatengon ua indine aganaha:
2018-19: Gong lak 13.19
2019-20: Gong lak 11.23
2020-21: Gong lak 11.97
2021-22: Gong lak 35.84
2022-23: Gong krore 1.39
2023-24: Gong krore 8.24
2024-2025 (Dec 31 ona): Gong kore 3.51
Unbaksana, niam gri koila bikotani (illegal coal mining) bidingo sing·anina aganchakengon, CM Sangma indine parakataha je, niam gri kam ka·giparangni kosako sorkari rakbee ja·kuko de·enga. Da·o dipet niam gri koila bikotani gimin mamla (cases) 22-ko register ka·aha aro iano jak donggipa sak 14 mine owner-rangko police-rang rim·aha.
High Court-ni ge·etaniko man·ani ja·man sorkari niam gri koila bikotaniko champengna rakbee kam ka·enga ineba ua talate on·aha.
Tags:
Meghalaya